Spiritual-Building Stone No. 197

Ano ba ang Denominasyon?

 

I Corinto 4:6-7,

“Ang mga bagay ngang ito, mga kapatid, ay inianyo ko sa halimbawa sa aking sarili at kay Apolos dahil sa inyo; upang sa amin ay mangatuto kayo na huwag magsihigit sa mga bagay na nangasusulat; upang ang sinoman sa inyo ay huwag magpalalo ang isa laban sa iba…”

 

Pakinggan ang sabi ng Propeta ng Diyos tungkol sa bagay na ito:

 

            Ngayon, wala tayong anomang laban sa ibang tao na nasa denominasyon. Wala tayong anomang laban sa kanila, subalit nais kong ipaliwanag kung bakit hindi tayo pumapasok sa alin mang denominasyon.

            Ngayon, tayo ay isang organisasyon. Tayo ay isang organisasyon, nakatala tayo sa pamahalaan bilang isang organisasyon, isang kalipunan ng mga taong nagkakatipon upang sumamba kay Cristo, subalit hindi tayo nakapaloob sa isang denominasyon. Walang sinomang tao ang maaaring kumontrol sa atin. Kita n’yo? Hindi ito isang denominasyon. Ito’y isang pagtitipon lamang ng mga mananampalatayang Cristiano. Sumasamba lamang ang mga tao rito, at itinuturing nila itong home church, kung nanaisin nila habang sila ay nabubuhay. [1]

            Ngayon, ako’y nababansagan bilang isang kontrabida laban sa mga organisasyon. Ngunit hindi ako ganun. Sa palagay ko’y mainam ang mga organisasyon, subalit kapag nagkakaroon na ng kabuktutan sa sistema ng inyong mga organisasyon, iyan ang nilalabanan ko. Kita n’yo? At hindi mahalaga kung ito man ay isang Oneness, o ito’y trinity, o maging ano pa man ito, kapag humantong na ang sistema sa isang dako, na nagsasabi, “Kami ang mga Assembly of God?” [2]

 

            Balikan ninyo, tuklasin ninyo kung saan ito nagsimula. Balikan natin ang pinagmulan ng larawan. At kung walang denominasyon sa Biblia, kung gayon ay mayroon itong pinagmulan. Nagsimula ito sa iglesia Catolica. Ipinanganak lamang nito ang mga Protestante.[3]

 

            Maraming mga tao ang hindi nakakaunawa sa akin kapag nagungusap ako tungkol sa mga maka-denominasyong bakod. Hindi dahil sa mali ang denominasyon. Kundi ang pagtatayo ng bakod sa palibot nito, dahil dito ay hindi na magawang makipagkatipon ng iba; iyan ang bahaging mali… Kapag humantong na tayo sa kaisipan na, “Kami na lamang ang nalalabing grupo,” Iniiwanan na iyan ng Diyos at pinagpapala na Niya ang iba, upang ipakita sa atin na hindi lamang tayo ang grupo. Sa ganiyang paraan kumikilos ang Diyos. [4]

 

            Isa lamang ang Iglesia, at hindi iyan isang denominasyon. Hindi mo magagawang idenomina ang Iglesia ng Diyos. May isa lamang Iglesia at isang Katawan. Ang Katawang iyan ay ang mistikal na katawan ni Jesus Cristo rito sa ibabaw ng lupa, at sa pamamagitan ng isang Espiritu ay binautismuhan tayo sa isang Katawan (ICor. 12:12-27).

            Anomang denominasyon ang kinabibilangan ng isang tao, kung sumasandal lamang siya sa kaniyang iglesia para sa kaniyang kaligtasan, siya’y mapapahamak. Kung ang isang Catolico ay umaasa lamang sa kaniyang iglesia para sa kaniyang kaligtasan, siya’y mapapahamak. Kung ang isang Baptist ay umaasa na magagawa siyang iligtas ng iglesiang Baptist, siya’y mapapahamak; subalit kung ang mga indibiduwal ay nagtitiwala sa Diyos at kay Jesus Cristo, “Sapagkat sa biyaya kayo’y nangaligtas sa pamamagitan ng pananampalataya; at ito’y hindi sa inyong sarili, ito’y kaloob ng Diyos.” (Ef. 2:8-9). [5]

 

            At magkakaroon ng isang samahan ng mga iglesia, at silang lahat ay magkakaisa, itatatag nila ang  isang pamunuan ng konpederasyon ng mga iglesia, kaya nga mayroon na sila ngayong isang malaking gusali ng U.N. at ang bawat denominasyon ay nakapaloob na rito. At kinakailangang ikaw ay kaanib ng isang denominasyon dahil kung hindi ikaw ay matatakwil. At ‘yan ang oras na kailangang ipakita natin ang ating mga kulay at magkaroon tayo na katiyakan, hindi lamang tayo nagbabakasakali, bagkus ay nalalaman natin na ang ating kinatatayuan ay ang ITO ANG SABI NG PANGINOON. Ang munting iglesia sa tuwina ay nasa minorya; isa itong maliit na kalipunan na tila baga isang manipis na sinulid, tulad ng pulang guhit sa Biblia, ganiyan palagi ang kalagayan ng iglesia. At nais nating alalahanin ang bagay na ito (Lucas 12:32; Mat. 7:13-14). [6]

 

            Nagawa lamang pagpalain ng lubos ng Diyos si Abraham nung siya ay ganap ng tumalima sa Kaniya at ihiwalay ang sarili nito (kay Lot). At hindi kailanman pagpapalain ng Diyos ang isang indibiduwal o isang iglesia, o isang kongregasyon, o isang denominasyon, malibang ito ay ganap na sumuko at maging masunurin sa Diyos.

            Tama lang sana ang denominasyon kung ganito ang paninindigan ninyo: “Ganito ang paniniwala namin, kuwit.” Subalit kapag ang paninindigan ninyo sa isang organisasyon ay, “Ito ang paniniwala namin, tuldok. Kung hindi kayo sasama sa amin wala kayong patutunguhan.”

            Kung babasahin ninyo ito ng ganito, “Ito ang paniwala ko, kuwit, at idaragdag ko rito ang anomang ipapakita sa akin ng Diyos,” ‘yan ang tama. Tama ‘yan. “Ito ang paniwala namin, at idaragdag namin dito ang anomang higit na dakilang bagay na  ipapamalas sa amin ng Diyos.” Kita n’yo, ang problema tinatapos ninyo sa, “Ito ang paniwala namin.”

            Ano ang nangyari kay Luther pagkatapos niyang makita ang Haliging Apoy? Aba, sinundan niya ang bagay na Ito. At ano ba ang ginawa niya? Pagkatapos ng panahon ni Luther, nag-organisa sila ng isang iglesia at tinawag ni itong Lutheran. At doon na ito namatay sa organisasyong iyon, sapagkat nagging katulad na rin ito ng iglesia Catolica.

            At, kamukat mukat mo, narito na si Wesley. Lumabas na ang Haliging Apoy mula sa organisasyon at ito ay nagpatuloy. Nakita ito ni Wesley, at sinundan niya ang bagay na ito. Ngunit nung pumanaw na ang unang kalipunan ng mga mananampalataya, inorganisa na nila itong muli, tinawag nila itong Wesleyan Methodist, o ang iglesiang Methodist. At nung inorganisa nila ito, doon na rin mismo ito namatay.

            Pagkatapos ay nakita ito ng mga Pentecostal, lumabas sila, hindi mula sa pagaaring-ganap, sa ilalim ni Luther, at sa santipikasyon sa ilalim ni Wesley, bagkus ay nakita nila ang bautismo ng Banal na Espiritu, ang panunumbalik sa orihinal na pagpapala. Sinundan nila ang bagay na ito (Ay, naku.), lumabas sila at nagsimula silang magsalita ng mga wika at gumana ang kapangyarihan ng Diyos sa pamamagitan nila. Ngunit ano naman ang kanilang ginawa pagkatapos nito? Inorganisa din nila ang bagay na ito. At doon din mismo Ito namatay. Subalit ngayon ay kumikilos na naman ang Haliging Apoy. Muli na namang kumukilos ang bagay na Ito ngayon. [7]

 

            Ngayon, ang dalangin ko, Diyos, samantalang nasasaksihan ko ang araw na ito kung kailan ay ginigipit ng denominasyon ang mga mananampalataya, tinitiwalag sila, at iginigiit na kailangang maitala muna ang kanilang mga pangalan sa kanilang mga aklat, kundi ay mapapahamak sila, wala silang pakialam sa ibang grupo. Tanging ang malambot na kamay ni Jehovah lamang, ang siyang aakay sa kanila sa Punong Kahoy ng Buhay.

            Dalangin ko, Diyos, na ang bawat isa… Nalalaman ko na magagawa nila, sapagkat ito’y Iyong Salita, at hindi maaaring mabigo ang bagay na Ito. At nawa ay marating namin ang Punong Kahoy ng Buhay, upang sa gayon ay maging tagapagmana kami ng Buhay na Walang Hanggan, makita nawa namin ang kamay ng Diyos, at sa pamamagitan ng mga mata ng pananampalataya, ay matanaw namin ang mga aninong nilalakaran namin sa araw na ito, makita namin ang lupang pangako na nagaantay sa aming patutunguhan. [8]

 

                        Masdan ninyo ang bagay na ito. Kumuha kayo ng isang mainam na butil ng mais na halong-lahi; kunin ninyo ang halong-lahi na binhing ito. Magandang butil ito. Subukan ninyong itanim ito. Ano ang makukuha ninyo? Uusli ang isang munting tangkay mula rito at unti unti itong maninilaw at sa huli ay malalanta. Iyan ang mangyayari sa bawat denominasyon kapag hinaluan nila ng mga salita ng tao ang Salita ng Diyos. Maaabot nila ang mga tanda at kababalaghan subalit kapag humantong sila sa sinabi ni Jesus tungkol sa pananampalataya sa Salita, maninilaw ito at sasabihin nila, “Hindi namin matatanggap ang bagay na iyan,” at babalik sila sa dati.

            Makinig kayong maigi ngayon. Hindi ko nais na lumampas sa inyo ang bagay na ito. Walang ibang iglesia, walang ibang tanda, walang ibang pagtitipon, walang ibang pamahalaan, walang ibang patotoo, walang ibang kredo, walang ibang denominasyon ang maaaring tanggapin sa labas ng bagay na ito. Ito lamang ang maaaring tanggapin ng Diyos. “si Cristo na nasa inyo, na pagasa ninyo sa kaluwalhatian” (Col. 1:27), ang tanging kikilalanin lamang ng Diyos. Hindi ang kung anong pagtitipon, hindi iglesia, hindi kredo, hindi denominasyon, o anopaman; ang lahat ng bagay ay pawang patay. Isa lamang itong sanga na kailangang putulin, na kinakailangang tagpasin upang si Cristo ay mabuhay at magkaroon ng kadakilaan sa inyo (Col. 1:18). [9]

 

            Subalit samantalang naroon si Cristo, at pinagpapala ng Banal na Espiritu ang mga tao, hindi natin alintana: ang kulay, kredo, o maging anopaman ang bagay na ito, tayong lahat ay nakababad sa isang malaking tangke ng Dugo, pagpapala ito ng Diyos, nagkakatipon lamang tayo sa ilalim ng Dugo ni Jesus Cristo, at hindi natin ito napupuna. Subalit kapag nagsimula na tayong magisip, “Alam n’yo, higit na magaling ang aking denominasyon sa kanila, higit na malaki kaysa sa kanila. Higit na marami ang aming mga miyembro,” d’yan nagsisimula ang problema.

            Iyan ang napapala nila, at lumalaki ang problema kapag nakakaligtaan nila na naroon Siya, pinaguusapan nila Siya datapuwa’t hindi nila napapagtanto na naroon Siya sa kanilang kalagitnaan. (Lucas 24:13-35). Sana’y mayroon akong paraan upang maidiin ko ng husto ang bagay na iyan.

            Masdan. Pinaguusapan Siya noon ng mga alagad, ngunit nalimutan nila na nakahiga Siya roon sa likod mismo ng barko na sinasakyan nila (Mat. 8:23-27). At ngayon, iyan ang naganap sa mga iglesia. Pinaguusapan natin Siya. Lubhang napakarami na ng mga intelektuwal, sukdulang ang mga tao ay naging bihasa na sa Kasulatan at humantong na sa punto na halos ay wala ka ng maipula sa paraan ng pagdadala nila ng mensahe. Subalit saan naroon ang Diyos? Iyan ang gusto kong malaman. Saan naroon ang manipestasyon? Kita n’yo? Mga sermon na intelektuwal… [10]

 

            Lubhang napakarami nating naririnig tungkol sa bagong sistema na ito na siyang magbubunsod sa isang relihiyosong sistema, alam n’yo, maghahatid ito diumano ng kapayapaan sa ibabaw ng lupa, kapag nagkaisa na ang mga Catolico at mga Protestante. Ilan sa kanila ay naniniwala sa Makalangit na pagpapagaling, ang ilan sa kanila ay hindi naniniwala, at ang ilan ay sumasampalataya sa bagay na  ito, at ang iba naman ay nananampalataya sa ibang paraan. At kailangang isantabi mo ang iyong pagaalinlangan na matagal mo ng malaon ng lumiligalig sa iyo, ang pananampalataya mong ebanghelikal, upang mapaloob ka sa World Council. At ang bawat denominasyon ay kailangang pumasok dito. Kaya nga kung ang denominasyon ay sinumpa, at mapapabilang ka rito, ano ang gagawin sa iyo nito? Ibabalik ka nito sa iyong pinanggalingan. Kung ang Roma ay ang ina ng mga denominasyon (Apoc. 17:1-6), at siya ay ang hayop at ang marka ng hayop (Apoc. 13:16-18), gumawa sila ng isang larawan nito, isang konseho, ang pinagsamasamang mga iglesia ang siyang bumubuo sa larawan ng hayop (Apoc. 13:11-15), samakatuwid ibabalik ka nito muli sa marka ng hayop. Ang sistema ng sanlibutan, denominasyonalismo, ang siyang nagtayo ng isang sistema upang isulong ang marka ng hayop. [11]

 

            Makikita natin sa pamamagitan ng mga tipo sa Lumang Tipan kung saan Niya piniling ilagay ang Kaniyang Pangalan at upang—kung saan ito naroon ngayon. Nayon, kung paanong nababanaag mo ang anino sa sahig, ang sabi ko, ang negatibo, bilang isang tipo, upang tayo, na mga mananamba ay masaksihan kung paanong ang mga anino ng Lumang Tipan ay unti unti nagiging positibo sa Bagong Tipan (Heb. 10:1).

            Ngayon, ang lahat ng mga piging, araw ng pahinga, ang buong tabernakulo, ang lahat ng kahoy, ang lahat ng bagay sa tabernakulo, ang lahat ng ito ay tumitipo kay Cristo. Ang lahat ng mga handog, ang lahat ng mga kautusan, ang lahat ng ito ay tumitipo kay Cristo. Dinadaanan natin ang bagay na iyan sa tuwina rito sa Tabernakulo. At sa pamamagitan ng mga bagay ito ay nakikita natin na ang bawat kredo, iglesia, at denominasyon ay labis nang napagiiwanan. Ang totoo hindi na nga ito kasali sa karera. Bawat kredo, bawat iglesia, bawat denominasyon ay ganap ng napagiwanan. Wala ng lugar para sa kanila. [12]

 

            Ngayon, nananampalataya ako na pinagtitibay ni Jesus Cristo na ang bawat Salita. Ang buong Kasulatan ay kinasihan. Hindi ako naniniwala na mayroon tayong karapatan, at pagkatapos ay kukundenahin tayo sa bagay na ito, kung magdaragdag tayo ng isang salita Rito o kaya’y magbawas ng isang Salita mula Rito. May sinasabi sa Apocalipsis 22:18-19. Nananampalataya ako na si Jesus Cristo ay Siya ring kahapon, at ngayon, oo at magpakailan man.

            Totoong iginagalang ko ang mga Lutheran sa kanilang paninindigan nung panahon nila, ang mga Methodist sa santipikasyon sa kanilang panahon, at ang mga Pentecostal sa kanilang paninindigan sa kanilang panahon; subalit tayo ay nabubuhay sa ibang panahon. Tayo’y nabubuhay kung kailan ang tangkay, ang suhay, ang ipa, ay halos katulad na ng trigo, subalit ang trigo ay nasa loob ng ipa. Inalalayan lamang ng ipa ang trigo, sinangga nito ang mainit na sikat ng araw upang hindi ito masunog. At ngayon, ay nababaklas na ang denominasyon mula rito, upang mabilad Ito sa Presensiya ng Anak (Son) upang ito ay mahinog. Wala ng organisasyon pang lilitaw. Ito na ang wakas nito. Kada ikatlong taon halos, tuwing may isang mensahe na lilitaw, nagoorganisa sila.

            Magdadalawampung taon na mula ng ito ay magpasimula ngunit wala pang naitatag na organisasyon mula rito. Hindi ito uubra. Tayo’y nasa panahon na ng trigo, panahon ng pagani. Nauulinigan ko na ang pagdating ng isang dakilang bagay. Isang araw ay uuwi na tayo. Tama. “Siya ring kahapon, at ngayon, oo at magpakailan man.” (Heb. 13:8). [13]

 

            Kilala na ba ninyo kung sino ang pinuno ng moderno, relihiyoso, masamang kapanahunang ito? Iyan ay ang Diablo na kinukuha ang punong kahoy ng mabuti at masama at inilalagay ito sa dakong iyon (Gen. 3:1-7; 2:15-17), inaakay ang maganda niyang kasintahang iglesia upang ikasal sa ecumenical council, ang maganda niyang kasintahan na iglesiang siyentipiko taglay ang lahat ng mga degrees na makukuha niya, ang mga Ph.D., mula sa mga Church of Christ, ang mga Ph.D., mula sa mga Baptist, Presbyterian, Pentecostal, at lahat na, taglay ang lahat ng kanilang mga karangyaan at naglalakihang mga simbahan, patungo silang lahat sa ecumenical council, “Isa lang tayo.” Hindi sila maaaring patawarin dahil sa bagay na ito. Ang paglalapat sa alinmang uri ng denominasyon ay ang marka ng hayop.  Tapos na tayo sa bagay na iyan. Takasan ninyo ang bagay na ito, mga anak, takasan ninyo ito. Kita n’yo? Mga naglalakihan at naggagandahang mga iglesia patungo sa isang kasalang ekumeniko, taglay ang kaniyang marka! Mga syort (Siyanga.), makasanlibutang kasuotan, sexy, pinturado, tunay na mga alagad ng diablo upang bihagin ang mga anak ng Diyos—upang pakasalan ang isang batang ganap-na-ipinanganak at akayin sa kahalayan na tulad niyan. Tama ‘yan. [14]

 

            Mayroon palaging kambal. At iyan ang dahilan… Huwag ninyo itong kalimutan, munting kawan. Ang iglesia sa huling mga araw ay mayroong kakambal, kahawig na kahawig na halos ay madaya nito ang hinirang: Mateo 24:24. Kita n’yo? Ito’y isang kilusang Pentecostal. Katulad na katulad ito ng totoo, hangga’t sa halos ay madaya na nito pati ang hinirang kung maaari. Mayamaya lang, kung magkakaroon ako ng pagkakataon, nais kong ipaliwanag, kung paano natutupad ang paghirang. Kita n’yo, magagawa nitong dayain sila, sapagkat magkahawig na magkahawig ang mga ito. Kita n’yo, lamang ay may dalawang ama, iyon lang; isang ina, isang iglesia, isang samahan, pareho lang. iisa lamang ang lupang hinasikan ng binhi, kung saan nalalaglag ang Salita; subalit isa sa kanila ay liko, sapagkat nagmula ito sa maling ama. Patutunayan ko sa inyo ang bagay na iyan balang araw, kung pahihintulutan ako ng Diyos, ang denominasyong iyan ay ang marka ng hayop. Kita n’yo, ito’y isang maling ama. Minamaneobra niya ang mga tao patungo sa isang denominasyon sa halip na sa Salita. Kita n’yo? Ito’y isang maling ama. Ito’y isang kilusan na nagmula kay Cain.

            Paguwi ko, mangangaral ako tungkol sa isang paksa, “Ang Bakas ng Serpiyente”: ang hayop sa pasimula, at ang hayop sa wakas, hahalughugin natin siya sa Biblia, at ipapakita ko sa inyo kung saan siya patungo. Kita n’yo? At ngayon, masdan ninyo kung gaaano siya katuso, kung sino talaga siya… Buweno, katulad lamang sila ni Judas at ni Jesus, magkalahi sa isang lipi, tulad nina Esau at Jacob. Katulad sila ng uwak at ng kalapati na dumadapo sa isang kawad. Pawang lahat ng bagay ay kambal sa dakilang digmaan na ito na kinabibilangan natin. [5]

 

            Abangan ninyo ang “Ang Bakas ng Serpiyente.” Tama. Ngayon, pagisipan ninyo kung bakit sila lamang ang denominasyon na bukod tanging nakarehistro sa talaan ng Diyos: “Hindi kayo pakikinggan ng Diyos maliban na kayo’y Methodist, o Baptist, o Trinity, o Oneness,” o anopamang bagay na tulad niyan. Mali ‘yan.

            Ngunit alalahanin ninyo na sa lahat ng bagay na iyan, kung mayroon mang isang bagay sa puso ng isang lalaki o ng isang babae na pinaniniwalaan nilang tama, kung gayon ay may isang bagay na tama sa isang dako. Tulad ng madalas kong sabihin, “Kapag ang kalaliman ay tumawag sa kalaliman, may isang malalim na tutugon sa panawagang iyon.” (Awit 42:7).

 

            Hindi ang Diyos ang may akda ng denominasyon, sapagkat ang denominasyon ay Babilonia, hindi Siya ang may akda ng kaguluhan. Hindi mo kailangang maging isang intelektuwal upang makita mo ang bagay na iyan. Ito’y Babilonia. [16]

 

            Sinabi ni Jesus na sa Kaniyang paglisan ay isusugo Niya ang Kaniyang Espiritu (Juan 14:15-18). At hindi Ito magagawang tanggapin ng sanlibutan. Tama iyan. Hindi Siya magagawang tanggapin ng sanlibutan, o ang sistema ng sanlibutan. Ganiyan ang organisasyon—isa itong sistema ng sanlibutan. Pakitaan ninyo ako ng isang sistema ng sanlibutan na puspos ng Banal na Espiritu. Gusto ko itong makita. Kung mayroon kayong maiipapakita sa akin na ganiyang uri ng iglesia ay mayroon kayong maling nakikita sa Salita. Hindi po. Wala isa man sa mga mensaherong ito ang nagorganisa. Bagkus sila ay itinatakwil o dili kaya ay lumalabas sila sapagkat sila’y pinararatangan ng kasalanan ng organisasyon. Paano mangyayari na nasa organisasyon ang Banal na Espiritu samantalang ang organisasyon ang nagiging kahalili ng Espiritu at ang denominasyon naman ang kahalili ng Salita? Alalahanin ninyo, ang “Organisasyon” ay “kamatayan”. Wala ng iba. Kapag nangibabaw na ang sanlibutan, umaalis na ang Espiritu. [17]

 

            Ngayon, ngayon, hindi mo magagawang ihalo ang kredo ng denominasyon sa Salita, sapagkat sila ay magkasalungat na magkasalungat, sa isa’t isa. Iyan mismo ang sinisikap gawin ni Satanas, igiit ang intelektuwal niyang kaunawaan kay Eva. Tinatanggap niya na sinasabi ito ng Diyos, ngunit nagpapaliwanag siya, “Tunay ngang hindi kayo mamamatay.” (Gen. 3:1-7). Kita n’yo, pinaniniwalaan nila ito, at iyan ang nagagawa ng isang kredo sa gabing ito. Ihinihiwalay ng denominasyon ang mga tao sa Salita ng Diyos. Hindi ba’t ang sabi ni Jesus nung Siya ay pumarito. “Kayo, dahil sa inyong mga tradisyon, ay winalawalang halaga ninyo ang mga utos ng Diyos sa mga tao.”? (Marcos 7:6-9). At sa pamamagitan ng inyong mga kredo, ay nakaligtaan na natin na magagawang pahiran ng Espiritu Santo ang Salita ng Diyos upang proteksiyonan niya ang lahing ito. Labis na nating inilayo ang mga tao sa pamamagitan ng denominasyon dahilan upang mawalan sila ng pagkakataon na makita ang bagay na ito. [18]

 

            Alalahanin, lumakad ang Israel, araw at gabi, sa pamamagitan ng Haliging Apoy. Kapag kumilos ang Haliging Apoy, sinusundan nila Ito. At alalahanin, Ito ay isang Apoy sa gabi, at isang Ulap sa araw. Kaya nga maaari Itong dumating, araw man o gabi, anomang oras. Ngunit, saan man Ito pumaroon, ay may taglay Itong pampalubag-loob, upang hindi sila mabigong makita ang bagay na Ito. Ito ay isang Liwanag sa gabi, at isang Ulap sa araw, at sinusundan nila ang bagay na Ito. Opo. Kapareho lang! (Exod. 13:21-22; 14:24).

            Nakita ni Luther ang bagay na Ito noon. Ano ang ginawa niya? Lumabas siya sa Catolisismo. Ngunit ano naman ang ginawa nila? Tinayuan nila ng pader ang paligid nito, ang sabi, “Kami’y mga Lutheran. Ito na ‘yon.”

            Nakita ni Wesley na kumilos na Itong palayo mula roon. Sinundan niya Ito. Ano ang ginawa nila? Nagtayo din sila ng munting pader sa paligid nito, ang sabi, “Ito na ‘yon.” Ano ang ginawa ng Liwanag? Kumilos Ito muli.

            Nakita ng mga Pentecostal ang bagay na Ito. Ano ang ginawa nila? Lumabas sila mula sa mga Wesleyan at mga Nazarene, at lahat na. Ang ginawa nila? Nagtayo sila ng pader sa paligid nito, ang tawag nila, “Kami’y mga oneness,” at “Kami’y mga trinity,” at “kami’y mga United,” at lahat ng ito. Ano ang ginawa Niya? Kumilos palabas ang Diyos mula rito.

            Kita n’yo, hindi natin dapat gawin ang bagay na iyan. Kailangan nating sumunod araw araw, sa bawat oras, sa bawat hakbang. Kailangang pangunahan tayo ng Panginoong Jesus Cristo. Dahil kung hindi, buhay na organisasyonal ang masusumpungan natin. At ang buhay na hindi sumusunod kay Cristo araw araw ay hindi karapatdapat.[19]

 

Reference:

[1] “Why Are We Not A Denomination” (58-0927), par. 15-16

[2] “Godhead Explained” (61-0425B), pg. 13

[3] “Baptism Of The Holy Spirit” (58-0928M), par. 105

[4] “Hear Ye Him” (59-0424E), par. E-4

[5] “It Wasn’t So From The Beginning” (60-1127M), par. E-26

[6] “Patmos Vision” (60-1204E), par. 57

[7] “Jehovah Jireh” (61-0209), par. E-47-48

[8] “Third Exodus” (63-0630M), pg. 7

[9] “Christ Is The Mystery Of God Revealed” (63-0728), pg. 41, 69

[10] “Go Wake Jesus” (63-1103), par. E-41

[11] “The World Is Again Falling Apart” (63-1127), par. 157

[12] “God’s Chosen Place Of Worship” (65-0220), par. 37-38

[13] “Does God Change His Mind” (65-0427), par. 212-214

[14] “God Of This Evil Age” (65-0801M), par. 145

[15] “Power Of Transformation” (65-1031M), par. 135-136

[16] “God’s Only Provided Place Of Worship” (65-1128M), par. 66-67, 92

[17] “Sardisean Church Age”, CAB pg. 251

[18] “Invisible Union Of The Bride” (65-1125), pg. 11

[19] “Is Your Life Worthy Of The Gospel” (63-0630E), par. 72-76

Spiritual Building-Stone No. 197 from the Revealed Word of this hour, compiled by:

Gerd Rodewald, Friedenstr. 69, D-75328 Schömberg, Germany

www.biblebelievers.de, Fax: (+49) 72 35 33 06

There´s coming one with a Message that´s straight on the Bible, and quick work will circle the earth. The seeds will go in

newspapers, reading material, until every predestinated Seed of God has heard It.

[Bro. Branham in „Conduct-Order-Doctrine“, page 724]